啱啱睇完郭富城演唱會，其實當初唔睇係啱，真係好難頂！

首先唔知係唔係上次三百六十度舞台加玩水太激，今次要承接舞台王者既氣勢，所以舞台更加出神入化，呢part 我buy, 舞台真係好正，簡直變咗好多Part，連估唔到既彈床都出埋！所以舞台真係好勁，亦令到效果好好。同埋百變既舞台再配埋燈光，的確令到跳舞既效果更好。

但係除咗舞台，我覺得主角真係好難頂。雖然佢一把年紀都咁買力唱同跳，係超級認真。但係佢嗰D over 既表情，一行出嚟扮晒嘢，加埋超級情深款款真係好鬼難頂。同埋佢今次造型攪咩，其實40幾歲尷尬年齡唔好染白嗰頭，好似阿伯咁，變返黑感覺會好D。唔好係度扮George Clooney，你扮咗好多年啦！

有幾次介紹D歌又out，咩飲牛奶會有限期，佢一講已經知唱有效日期，但係呢個爛方法，真係好難頂。仲有介紹強都係，不過佢未出聲嗰刻已經估到佢唱強，所以連佢講都唔想聽。

十年如一日既握手位又係唱個個讚你乖。見到D dancer 帶帽，雖然嗰Part 換咗另一邊舞台，玩咗好多射燈效果，不過無論佢哋再跳咩，都估硬會唱失憶諒解備忘錄。果然又無估錯。其實我已經無睇佢近呢兩至三次演唱會，但估唔到都係咁樣。我唸唯一少咗係慢歌，舞台王者，真係放棄咗好多慢歌，不過我亦估佢唔會唱得好，因為其實佢都幾唔夠氣，係用嗰咪既聲加大出音，所以講嘢時我反而覺得佢好多時刻要要大聲叫，同埋佢唱快歌，最後大聲嗰D音都似用喉嚨唱，佢唱到咁多場都算係咁。

不過佢D音響真係唔算好，一開始佢狂跳，佢嗰無線咪沙聲到呢！無電應該一早換啦！可能攪到我投入唔到都係佢一開始把聲太差！ 

最後我想講，我真係唔覺得郭富城好睇lor，佢再開我相信我都無咩興趣睇。今次無睇到黎明，我俾唔到評語，不過睇嚟四大天王都係好out，唔係呢個年代真係唔係呢個年代，我相信作為金曲回顧時先參與會比較好lor！

今個聖誔假節目都算豐富。首先唔like BBQ 既我有兩日都去咗BBQ。

首先係一連一度馬德里聚會。其實呢個名真係好低能，中學時期果然係好幼稚。因為一首梁朝偉既歌 - 馬德里的情人，自此我哋成日都講馬德里王國，有大王、有夫人、有公主、歌姬、御醫及左青龍右白虎，講完都覺得低能。今年仲難得係大王到攪。一入屋既四隻警犬真係嚇怕，再加夫人一隻 - 五隻，所以御醫一定避席啦！我哋仲係那些年張海報影咗張相，仲話過年時再嚟，我哋補返張係天台影。

其實我哋呢班感情都幾好，問心讀書時真係唔算最最最frd，不過反而畢業後，我哋大時大節，總會約出嚟！而聖誔節亦必定有交換禮物既環節，每年小露寶一定有好多鬼主意，今年就抽到佢哋既鼻毛機啦！而大王就更得到佢哋別出心裁既100人仔。

除咗呢個BBQ，另一個BBQ活動就係去Jac 屋企。係yoho midtown嗰club house度燒嘢食！有成五個小朋友，真係每次見到都覺得有小小煩，不過好在有工人，加上由佢哋負責燒，坐係度等食就得啦！當晚既牛肉粒真係好好味。BBQ完，仲有一個聖誕蛋糕等緊我哋！真係未試過，好滿足！

BBQ兩餐，睇戲亦睇咗兩套，mi4: 鬼影約章同埋福爾摩斯。我覺得mi4 好睇d，雖然無驚險，因為知佢一定刀槍不入，但劇情整體較好。相反福爾摩斯，我就覺得第一集好睇d。不過我其實幾like Robert Downey，所以睇佢都夠。

跟住兩日都見到Cherry 啦！首先係25號啦！Carol 同Thomas 補請我哋既生日飯。之後，我仲去咗大球場睇波，不過真係好悶！果然足球係唔啱我睇，而香港足球就更唔啱啦！

另一日27號，我哋去咗Martin 屋企，佢間屋既view好靚，如果放煙花應該好正，我哋都狂影由有太陽影到開晒燈！除咗景靚，佢預備既食物亦好豐富。有三文魚、鰻魚、海膽、同埋北海島長腳蟹。再加上紅酒、白酒、汽水、薯片同牛肉乾，真係飽晒！到夜晚再係樓下食上海嘢，同埋幫Patch慶祝生日，仲有一個好好味既蛋糕，真係超滿足！

話咁快已經係最後一日，放假既時間真係過得好快！今日一早都係懶床到爆！原先係唸住7點起身浸溫泉，點知6點9望吓裱未到時間，7點2叫自己瞓多陣，所以攪到7點半打後先起身！不過今日明顯好好多。

去到浸溫泉，我呢刻真係唔敢浸咁耐，話晒我噚日係無食過嘢，空肚浸，暈咗都唔知。 不過一早浸完真係醒d又舒服。係酒店食埋嘢就去陽明山公園。車程好快就去到，行咗一圈，都無咩特別嘢睇。sue 形容同行維園差唔多，咁我唸好過維園，但唔特別 lor！行完一圈後，我哋就等巴士去竹子湖！

竹子湖好似係再高d既地方，所以一出巴士都幾凍。跟住沿條小河行，又落雨，真係凍到死。其實環境都唔錯，不過真係感受唔到美景，只感受到寒意！所以好快去返巴士站等車。離開竹子湖，我哋就離開陽明山啦！轉車出返劍潭站，我哋坐的士去食日本嘢！

食日本嘢既地方係過咗圓山既地方。間日本餐廳係大姐介紹，去到見到有日本食材賣。等咗一陣帶咗我哋行咗去另一邊。坐好位我哋同佢講得半個鐘食，所以好快已經嚟晒d嘢食！我哋每人叫咗一個午餐share，但價錢分別係千五同千二台幣。勁！Lunch 都咁豪！不過都真係好底食，因為香港一定食唔到。最少有五度菜，再加雪糕同咖啡，你話勁唔勁！我哋最後都無可能用半個鐘食完，所以唯有食完之後坐的士直返西門再由西門直去台北車站！

去到台北車站係兩點，sue就搭巴士走我就繼續行。係台北搵咗李儀餅店買咗手信先，跟住得返幾百蚊台幣，所以要搵地方換錢。去咗天成不過唔換到，佢叫我去新光三越，最後攪得嚟已經三點。跟住我即刻要去中山站，睇吓master piece，發覺無咩新款，跟住行返ppaper 睇吓有冇開，都係無，就行去飲噚日飲唔到既珍珠奶茶。d奶茶我就覺得淡，但珍珠真係好ok。

飲完都差唔多4點，即刻要返西門，不過眼見仲有少少時間，所以好想去誠品一趟，點知誠品116係無誠品，又唔係好記得間誠品係邊，都係算！哎吔！跟住又發覺忘記了買手信，要去掃一次街，所以攪到我好趕咁攞埋行李同埋去台北車站。我係搭5點20分班巴士出機場。我班機係7點25分，啱啱好6點18分巴士到機場，真係趕死！估唔到係最後一日，係咁趕咁完成今次旅程。

返嚟既機程上，我坐窗口位置，難得到香港係無瞓著，所以居然可以望到維港夜景同埋啱啱係9點既時份，我見到迪士尼放煙花，最衰無相機，唔係可以影底佢。台北之旅真正完結 lu！

今日簡直係旅行既污點。一起身覺得好鬼熱，都唔記得攪咗d咩先，完全係頂唔順要沖涼，但係再頂多一陣都係好辛苦！所以強烈要求下，希望再瞓多陣，瞓多咗唔知半個鐘剩一個鐘，都係好唔掂，唔掂到終於嘔啦！嘔完就好似醒咗，跟住就執嘢，點知又好似痾咁！真係撞鬼，除咗唔想食嘢，都總算行得起身，離開酒店出發！

因為超級既賴床，所以俾原本出去既時間遲咗一小時。我哋第一站係食嘢，係西門町附近，叫做明星咖啡館。係酒店過去其實好近，我哋11點幾到，雖然嚟到，但係唔好話食，我連杯咖啡都好唔想飲。我好辛苦先飲咗兩啖。佢個咖啡真係好濃，係苦澀嗰d。坐咗大半個鐘我哋就走，行返出捷運站。呢條街都有好多手信店，仲有新東陽，最後一日走之前應該可以係度買手信。

去到捷運站前，我又再頂唔順將嗰兩口咖啡都嘔返出嚟，所以我好明杯咖啡真係好苦。我哋坐車去行忠孝東路，我已經唔記得我由邊個站出，完全係有d呆咁跟住sue行。我記得去之前問我係唔係唔駛帶腦，本來都應該係，不過今日無帶腦嗰個係我，我只係跟住行，無癮既程度，係我連相機都無攞過。我哋應該係行咗敦化附近既小店舖，有去過Lomography，見到鼎泰豐、度小月。而呢頭的確好多舖頭，仲有好多係賣日本衫。我都睇中架，而家仲唸住。但係成三千蚊港紙去買件簿褸，真係過唔到自己。

睇到靚嘢就來自日本，又貴。其他嗰d又似淘寶，始終都係無嘢買到。 行到兩點左右，唔知講咩話我好想唱Karaoke，可唔可以唱一個鐘。於是我哋去咗唱啦！sue就係度點嘢食，我就叉咗電咁，嗰一刻好醒地唱歌。好多新歌都唔識，所以只係伴唱。主力係唱柯震東，當然亦有張智成同那一年啦！不過唱嗰刻尚算精神，但一行樓梯落樓，我又頂唔順將烏龍茶嘔埋。真係正爆！算啦！自己頂住行埋今日既路啦！

去到中山，我相信我係遊魂，完全唔知自己仲咩。都係sue帶去週圍既小舖頭。不過我都有少少失望，因為我都係買唔到一條相機繩。睇完之後就行咗去光影之家，影吓相睇埋嘢，sue就去飲正宗既珍珠奶茶。我就全程趴係枱瞓。到佢慢慢享受完，我哋就起程到陽明山。

我哋由劍潭站搭公車上酒店。其實我哋望住士林夜市，如果我唔係病，我係相信我會強烈要求去行一轉同埋飲我最like既排骨湯，不過真係有心無力。我仲要衰到驚嘔，一上車就瞓！車程大約35分鐘，去到我哋住既酒店 - 陽明山中國麗緻酒店。房都幾正幾舒服，影完一輪相，我哋就去浸溫泉。浸咗一個鐘左右，我哋就預備去食晚飯。

睇旅遊書陽明山有間餐廳可以望到台北市，景觀一流，而睇到d相係電視劇「就想賴著你」都有係度拍過，所以更加會想嚟啦！不過今日嚟到，環境的確好靚，但係落住雨同埋咁凍，真係影響咗！不過坐既地方係一間間玻璃屋，景觀同埋雅興都仲有既！只係無食慾姐， 就算係美味既燒肉都........... 我只係去到最後食咗半隻粟米。

食完飯就返酒店，今日係我最早瞓既一日，不過咁正既酒店係要好好享用。

第二日要比較早出門，酒店係有早餐包。所以係酒店食埋嘢，我哋就搭捷運到台北車站，再轉火車去瑞芳站。同計劃一樣搭9點7既火車，10:22分到達 瑞芳。坐平溪線要等到59分，所以係火車站影吓相先。之前去九份都係去呢個站，不過就出去搭巴士，但今次就再坐火車。影完一輪，終於坐小火車入平溪。 

11:45 我哋去到終站菁桐。今日天氣都幾唔好，一路係度落雨，攪到好似凍咗少少。但都無損我哋既雅興。呢度環境的確好靚。最正都係條鐡路。不過周圍仲掛咗好多有許願既竹筒，咁又另有一番景象。

等到下一班車，我哋就去下一個站 - 平溪。原先我一心只係唸住十分，無唸過出平溪。不過係瑞芳站有遊客中心，見到平溪老街，原來係那些年入面放天燈既地方，所以緊要停步啦！除咗放天燈既位，呢度仲睇度條鐵路過其中一條橋，雖然好短，但好恐怖，我人行都唔敢行過去，驚跌啊！

今日係星期五，班次比假日少，所以我哋要係平溪等幾耐，所以就食埋午飯。Sue 勁啊，唔知點解可以一個人食個麵再加餸，而我叫咗個山藥排骨湯，加埋share 既餸。嗰湯食唔到藥味，但好清甜，好多薯仔。

食完又趕火車搭去 - 十分。 十分嗰車站之前sony都係度拍廣告。而呢度亦比較熱鬧。加上兩邊好多手信舖。亦有好多人放天燈！我哋先行吊橋，Per同Cherry應該唔會行架！(哈哈哈哈) 跟住就過埋d手信舖向十分瀑布行啦！係咁落雨，又越行越無人，都幾凍吓！十分瀑布比較遠少少，距離下一班車得九個字時間，但唔搭呢班就要差唔多兩個鐘，真係破壞晒我d計劃，最憎！不過都無計，咁遠嚟到，唔通唔睇瀑布。

好似行咗好遠咁，去到差唔多到，過埋條鐵路，居然睇瀑布係要收錢，真係估佢唔到，唔怪得政府既旅遊都少介紹啦！落住雨既一刻去瀑布，d水花都覺得無咩嘢！ 都係落雨怕d，攪到連我部機都唔work！瀑布都好澎湃，最重要係同佢距離好近，都算無嚟錯！

睇埋瀑布就離開平溪啦！而返出去時，居然唔駛一定去到瑞芳，司機講話可以係猴硐呢度轉去台北，咁就真係快好多，唔駛又係瑞芳站等幾個字！最正係有位坐麻！呢程車真係最好瞓啊！

出到台北車站，唸住睇吓d手信餅店，點知都唔係想像中嗰d，似去咗日本多d！跟住我哋去埋誠品，就到師大夜市啦! 先由公館站落，不過好似食嘢為主，唔係咁多小店仔。去到台電大樓站就好d啦，又多人啦、又真係有d小店舖！攪到我都係度跌錢啦！我哋叫做行咗夜市，就出返去食麻辣火煱，都係叫行到邊食到邊！不過呢d一人一鍋都係差d，唔夠辣！只係算過吓癮！

食完都十一點，我哋行程緊係 未完啦！我哋去返西門唸住飲嘢，不過只係得咖啡店，旺角都有酒吧，點解呢度........ 最後我哋跟旅遊書去咗唔知咩區度飲嘢！兩條女叫咗一枝白酒飲，最攪笑係酒吧老闆係香港人同我哋傾計lor！都唔記得攪到幾點，只係知我返到酒店仲 upload埋d相，上床已經就快5點既事！